گینه گلدی رمضان هامی مسلمان اولاجاق
دین اسلام اوجالوب خلق نماز خوان اولاجاق
گله جق غیرتده فاسق، اولاجاق اهل تمیز
ایتدیقی معصیته جمله پشیمان اولاجاق
مسجدون تاخجاسی حسرت قالاجاق مهر اوزونه
هره بیر مهر تاپوب بنده یزدان اولاجاق
بیر محرمده چیخوب شاهقلی بو مسجد دن
بیر ده بو آیده گلوب داخل ایوان اولاجاق
قولاقین دورد ایلیوب ماللیا آغزین آچاجاق
باشنی سلکلیوب واله و حیران اولاجاق
اوروجون میل ایلینلر چیخاجاقلار سفره
ایله بیر هاموسی زوار خراسان اولاجاق
او آداملار که ایدوب میلته چوخ جور وستم
هاموسی بیر گئجه ده قاری قرآن اولاجاق
دوزه جاق نعمت الوانی داداش سفره لره
فقرانین بو جهتدن جگری قان اولاجاق
چکه جاق رشوه پولینان پلوی دوری لره
آتاسین یاده سالوب مایل احسان اولاجاق
دولاجاق مسجد و محرابه جماعت سوری تک
الده تسبیح هامی عابد دوران اولاجاق
بینوا واعظ شهرین بوغازی یرتیلاجاق
مجلس موعظه از بسکه فراوان اولاجاق
کبلائی توبه ایدوبدور یاغا پی قاتمیاجاق
مشهدی ایلدیگی ظلمه پشیمان اولاجاق
گله جک دسته بدسته باجیلار موعظیه
مسجدین هر طرفی روضه رضوان اولاجاق
کودری چادرا باشندا مانیکور باشماقیلان
فر قویوب تللرینه فتنه دوران اولاجاق
بعضی قیزلار که نه الله نه پیمبر تانیوب
آیری یرلرده گزوب مرثیه عنوان اولاجاق
هر کس اوز بد عملیندن ایده جک استغفار
نور ایمانیله هر قلب چراغان اولاجاق
ایله که چیخدی اوروجلوغ گیده جاق اوز ایشینه
گنه اوّلکی کیمی مرشد شیطان اولاجاق
ییه جاق مال یتیمی آچاجاق ظلم الینی
قزادوب صورتنی مثل بادمجان اولاجاق
هچ گناه اولماسا بسدور بیزه بو صوم و صلاة
قبر ایچینده بیزه او حائیل سوزان اولاجاق
نقدر ساغدی کریمی یازاجاق شعر و غزل
سوزی هر عصرده هر شهرده اعلان اولاجاق!!
استاد کریمی مراغه ای
کاربر برتر مـاه
